За училиштето – ОСУ „Ацо Русковски“

Добредојдовте во

ОСУ „Ацо Русковски“

Општинското средно училиште „Ацо Русковски“ е единствено средно училиште на територијата на двете општини Берово и Пехчево. Гимназиското образование во Берово датира од далечната 1951/52 година како неполна гимназија, а од учебната 1953/1954 година е верифицирана полна гимназија под име „Страшо Пинџур“. Потоа е преименувана во „Моше Пијаде“, а по трет пат е променето името на 4 септември 1961 година во „Ацо Русковски“, коe име го носи и денешното Општинско средно училиште во Берово. Од 1977 година е воведено и стручно образование со разни струки од кои во континуитет до денес опстојува текстилната струка.

Од основањето на училиштето воспитно-образовниот процес го реализираат голем број наставници кои доаѓале и си заминувале, а средното образование го заокружиле над 8000 средношколци, од кои не мал дел станале врвни стручњаци и доктори на науките во разни области. Од почетокот на работето на училиштето па до денес опстојувале повеќе насоки и струки (гимназија, економска струка, текстилна, дрво-преработувачка, културолошка, електротехничка струка), а моментално се реализираат планови и програми за гимназиско образование од општествено-хуманистичко и природно-математичко подрачје и стручно образование од текстилно-кожарска струка, угостителско-туристичката и шумарско-дрвопреработувачката струка.

Со цел да се задоволи интересот на учениците и потребите на локалната средина се прават напори за воведување нови струки. Моментално во училиштето се стекнуваат со средно образование 300 ученици распределени во 24 паралелки од кои 13 гимназиски и 11 стручни паралелки. Од учебната 2008/2009 година по иницијатива на Министерството за образование и наука нашето училиште е вклучено во пилот програма за отворање на дисперзирани паралелки. Во таа насока во учебната 2008-2009 година во зградата на ОУ “Ванчо Китанов” Пехчево се дисперзирани по 2 паралелки во I и II година и по една во III и IV година, додека денес (2023-2024) во посебно реновирана општинска зграда имаме само по една паралелка во втора и четврта година. Воспитно-образовниот процес го реализираат 48 наставници, кои во потполност ги исполнуваат бараните услови за настава, а во целосното функционирање на училиштето учествуваат 5 стручни соработници и уште 10 вработени како хигиено-техничка и административна служба. Од 2007 година со процесот на децентрализација, функционирањето на нашето училиште е под надлежност на Локалната самоуправа, а со тоа од мај 2007 година се преименува од Државно во општинско средно училиште.

Нашето училиште е вклучено во повеќе проекти и програми:

1.Еразмус + програма во стручното образование

2.SEA проект – Активности во средното образование

3.GLOBE – Светска еколошка програма, соработка со Министерство за животна средина и просторно планирање

4.Промоција на хумани вредности (соработка со Црвен крст)

5.Осигурување на квалитет преку апликативни воспитно-образовни и наставни активности

6.Поттикнување на младите во политичките процеси – образование на млади гласачи

7.Советување на родителите

8.Програма за превенција од насилство

9.Програма за соработка со родителите

10.Фискална едукација на младите